Вацлаў Граб’е
народжаны ў пратэктараце
Чэхіі і Маравіі
у чэрвені 40-га
наўрад ці
калі мог чакаць
што няўрымснага і маладога
жыцця
дарога
абарвецца ў няпоўныя 25
Што тут сказаць
Паспеў ён многа
Дзяўчат пакахаць
шлюбам пабрацца дзіця нарадзіць
развесціся неўзабаве
скончыць амаль інстытут
два гады ў казарме паспаць
змяніць дзесятак прафесій
ад рознарабочага і выхавацеля
ў інтэрнаце
да рэдактара
аддзела паэзіі
і настаўніка мовы
і літаратуры
І вядома
навучыцца йграць джаз
піць ром выстаўляць напаказ
жыццёвую праўду
у вершах
якія
у выкананні яго прыжыццёвых таварышаў
збіраліся слухаць шматтысячныя
стадыёны
Не дачакацца прызнання
і ганаровага звання
выбітнага чэшскага бітніка
і памерці
ў выніку
няшчаснага выпадку
атруціўшыся чадным
газам
ды застацца жыць у мільёнах сэрцаў
насуперак
войнам
агню
забыццю
і ўсім іншым заразам
Сяргей Сматрычэнка