Нарадзілася 12 лістапада 1977 году ў мараўскім гарадку Вэлкэ Мэзыржычы ў каталіцкай сям’і. У юнацтве пэўны час правяла ў кляштары. Сышоўшы з яго, скончыла медвучэльню, пасля якой працавала аперацыйнай медсястрой. Цяжкая хвароба меншага сына вымусіла яе звольніцца з працы і цалкам прысвяціць сябе догляду дзіцяці.
За дэбютную кнігу інтэрв’ю “Пераўвасобленыя мары” (Proměněné sny), якая выклікала вялікі розгалас у чэшскім каталіцкім касцёле і ў шырокай чытацкай аўдыторыі, у 2007 годзе атрымала літаратурную прэмію Magnesia Litera ў галіне публіцыстыкі. Адно з інтэрв’ю з гэтай кнігі друкавалася ў перакладзе на беларускую мову (пераклад Лізаветы Касмач) у часопісе “ARCHE” (№6, 2009). Новая аўтабіяграфічная кніга “Я – голад” (Já jsem hlad) расказвае пра драматычнае змаганне з анарэксіяй на фоне шырокай карціны прыватнага жыцця аўтаркі.
Цяпер Пэтра Дваржакава сама выхоўвае двух сыноў, завочна вучыцца на філасофскім факультэце Універсітэта імя Масарыка ў Брне, працуе капірайтэрам і публікуецца ў спецыяльных медыцынскіх выданнях.