З 15 па 19 верасня пройдзе найбуйнейшы ва Украіне кніжны кірмаш – Львоўскі Форум выдаўцоў. Дэвіз сёлетняга кірмашу – “Час чытаць”.Сямнаццаты міжнародны «Форум выдаўцоў» адбудзецца ў львоўскім Палацы мастацтваў. Прэзідэнт ГА «Форум выдаўцоў» Аляксандра Коваль сярод найважнейшых мерапрыемстваў цяперашняга Форума назвала 5-ы Міжнародны літаратурны фестываль, Бізнэс-форум, Заходнеўкраінскі бібліятэчны форум і конкурс «Найлепшая кніга Форуму – 2010».
Усяго ў межах 17-га Форуму выдаўцоў адбудзецца больш за 400 розных акцыяў: канцэрты, літаратурныя вечары, круглыя сталы, канферэнцыі, прэзентацыі, трэнінгі. У гэтых мерапрыемствах возьме ўдзел 291 пісьменнік з 24 краін: Аўстрыі, Азербайджана, Афганістана, Вялікабрытаніі, Грузіі, Даніі, Ізраіля, Каталоніі, Латвіі, Літвы, Германіі, Нарвегіі, Польшчы, Расіі, Сербіі, Сінгапура, Славакіі, Украіны, Фінляндыі, Харватыі, Чэхіі, Швейцарыі і Швецыі.
Сярод спецыяльных гасцей Форума – Януш Леон Вішнеўскі (Польшча), Андрыян Слівоцкі (ЗША), а. Ксаверый Кнотц, Марэк Краіўскі, Кшыштаф Варга (Польшча), Леанідас Донскіс (Літва), Тэрэзія Мора (ФРГ), Леанід Юзэфовіч, Леў Рубінштэйн, Барыс Дубін, Міхаіл Фрыдман, гурт “АукцЫон” (Расія), Міраслаў Марыновіч, Яўген Быстрыцкі, Аксана Забужка , Юры Андруховіч, Вольга Багамолец, Тарас Чубай, гурты “Даха-Браха” і “Перкалаба” (Украіна).
Падрабязную праграму мерапрыемстваў Форуму чакайце пасля 7 верасня на сайце bookforum.com.ua.